=جف جف القلم

ياشوق تحرق عيوني لاجلك العبره
ابطى وصالك ودمع العين يشويهـا

ضاق الرياض بعيوني واختفى كبره
وانا على شوفتك نفسـي ممنيهـا

ياقو عزمي على بعدك وياصبـره
اغفل عن النفس باذكارك واحاكيها

ان كان عظمي كسير ارجيك ياجبره
وان كان نفسي تخف جروح داويها

سمعني الصوت روحي فدوة النبره
اموت واحيا على النبره وراعيهـا

ياوجد قلبي وجد من جهزوا قبـره
له منيتن في حنايا الصدر مخفيهـا

نفسه عليها تفيض شجون معتبره
لو وزعت في صدور الخلق تكفيها

شوق ووله من زمانه عجل بثبـره
ايامه البيض قفـت مـع لياليهـا

جف القلم من كتابه وانتثر حبـره
ماباقي الا وصـاة الـه يوصيهـا

الكون كله يضيق بمنسـم الابـره
والناس غير الحبيب مااعتنى فيها

قولوا سهم بالغلا باقي على خبـره
ماخان ذيك العهود ومات موفيهـا

مالاق غيرك بنون العين في سبره
كن العذارى رجال اللـي يراعيهـا

ادمين